குமரகுரு கவிதைகள்

விளையாத நிலங்களுக்கு மேலே
பறக்கும் பறவைகளின் நினைவில்
விளைந்த காலத்து தானியங்கள்
விதைகளாக மாறுகின்றன!

******

பாடைக்கு
தென்னமரக்கீற்றோலைகளைப் பின்னும் அவன் விரல்களின்
வேகம் பார்த்ததும்
நினைவில் இறந்தவனின் விரல்கள்
கீபோர்டில் டைப் செய்வது
நினைவில் வந்து போகிறது…

******

பாஸ்வேர்டுகளை மறந்துவிடுகிறார்
பின்களை மறந்துவிடுகிறார்
எழுதிக் கொடுத்தும் பார்த்துவிட்டேன்
நோட்டைத் தொலைத்து விடுகிறார்.
ஆனால், தூரத்து பெரியப்பாவின்
ஒன்னு விட்ட சித்தப்பா பையனின்
பெயரை மட்டும் தூக்கத்தில் கேட்டாலும் சரியாக சொல்கிறார் அம்மா!

******

குற்றவாளியின் மூலம் நிகழ்த்தப்பட்ட
குற்றத்தின் பின்னணியில்
நகர்ந்து கொண்டிருந்தது வஞ்சம்
யாராவதொருவருக்கு செய்யப்படும்
சிறு துரோகம்
தன் கிரியாவூக்கியில்
வேறொருவரை இழுத்து
கழுத்தறுத்துப் போட்டுவிடுகிறது.

*****

கதைகளை சுமந்தபடி அலையும்
நபர்களிடம் எத்தனை நோய்கள்?
மருத்துவமனைகளாய் மாறிய வீடுகளில்தான் எத்தனை மருத்துவர்கள்?
மருந்துகள்தான் உணவு என்றும்
உணவுதான் மருந்து என்றும்
எத்தனை சண்டைகள்!!

உணவை மருந்தாக்கிக் கொண்டு வாழ்பவர்களே!
மருந்துக்கும் உணவில்லாதவர்களுக்குதான்
உணவே மருந்து!!